ما تفتكرش ---------بقلم الشاعر صلاح الصغير عطا

ما تفتكرش


---------


ماتفتكرش


إن جمالك عدى الحدود


فاق العبير وكل الورود


ونسيم مهفهف ع الخدود


ماتفتكرش إنك قمر عالى


بسهر معاه طول الليالى


شاغلى بالى مغيرلى حالى


ما تفتكرش إنك ملاك


ولا حتى دايب فى هواك


ولا إن روحى ساكنه فى سماك


وما تفتكرش إنك حبيبى


وإنك قدرى ونصيبى


وإنك دوايا وطبيبى


بس أفتكر إنك أكتر بكتير


م الحب والتنهيد


وإنك قريب لو بعيد


وإن وصالك ليا عيد


إفتكر دقات قلبى بتعشقك


وإنى أنا كلى لك


وإن فى سهادى بحنلك


وما تفتكرش إن غرامى ليك كلام


لا ياحبيبى ده شوق وهيام


لدرجه إنى بتخيلك أحلام


وحبى ليك مالوش أوصاف


لما قلبى عليك يخاف


حارس على بابك وطاف


وما تفتكرش


غير إنى بحبك


وأتمنى قربك


ويعشقنى قلبك


وأعيش العمر وياك

Posted in: شعر