على كوبري ستانلي انا واقف
والبرد شديد
باصص ع الميَّه وكان منظر
بـ الحق فريد
كانت شتويَّه وعلى جسمي
من لبسي مزيد
في الليل فيه نور عمَّال يِضْوِي
على مركب صِيْد
الموج يرفعها وبيها ينزل
بلا شرط وقيد
ورغاوي البحر ..كمان صوته
عاملينها نشيد
وانا هايم فيهم ومُتَيَّم
من غير تمهيد
حسيت على كتفي بـ حنيه
إتحطت إيد
بصيت لـ ملامحه المعروفه
من غير تجاعيد
وبشكله الطيب المبهر
أسعدني أكيد
كان (بيرم التونسي) ياناس هوَّ
كده بـ التحديد
ولقيته عارفني ودعى ليَّ
وبعمر مديد
وأخدني معاه إتمشينا
ووصلنا بعيد
وانا فعلاً طاير وكإنِّي
يوم وقفة عيد
ولاكنت مرتِّب أفكاري
وبإيه ح تفيد
ده (بيرم التونسي) ياحبايبنا
ابو فكر رشيد
وشكرني عشان كاتب عنُّه
انا أحلى قصيد
حسيت بيه يهمس في وداني
بكلام تغاريد
حسسني معاه بالأبَويّه
وبشكل جديد
قال إكتب زي مايحلالك
في الحق...وزِيد
وقصايدي عنُّه يرددها
اجمل ترديد
قال عارفك عايز تتحفني
بـ ديوان تمجيد
ومشيت مستغرب وانا فكري
في ساعتها شريد
ما عرفتش اعبَّر وقتيها
غير بـ التنهيد
وضغط على إيدي وقال إسمع
خُد.. مِنِّي رصيد
ح يفيدك وانت بـ توصفني
و _ ح تبقى سعيد
وقعدت معاه فوق الرمله
بـ نقول..ونعيد
م البرد بـ تحمينا مَظَلَّه
من أي جليد
كلمني كتير عن بداياته
وما كان بـ يكيد
وحكى لي كمان وقت ما سافر
من مصر طريد
وإزاي الحُب ده بـ يدَوِّب
تهديد ووعيد
ونصحني وقال خُد بقى مِنِّي
ماتعيشِّي وحيد
إتعرف دايماً أو صاحب
أسياد وعبيد
إقرا لي وغيري عشان تبقى
عندك تجديد
في نقاشك حاول تتجنب
فيه التصعيد
وبلاش تتكلم عن حاجه
من غير تأكيد
واياك (ياسي) خالد من آفة
حُب التسييد
وابعد عن رأي تكون شايفه
مش رأي سديد
واتنازل حَبَّه بلاش تبقى
مُتعِب وعنيد
واتواضع ..تكبر وتحقق
كل ما بتريد
دي نصايح غاليه وباهديها
لـ إبن أبو خربوش
ولاعمري اقولها أو.اعيدها
ع اللي مايدروش
ولاحتى انطقها لـ ناس بيها
مابينتفعوش
أدِّيها لـ مين يعمل بيها
بلا أي رتوش
ده لسه كلام عمنا ( بيرم )
ما باذوقهوش
بـ يقول انا عارف إيه قولته
م اللي ماقولتوش
لـ مُحِبِّي الشعر نده ليهم
قال....ماتكابروش
انا - ح اهدي عبايتي أنا لـ شاعر
مابتعرفوهوش
ح يكون إهدائي على ديوانه
له زي نقوش
قالوا ده إهداءك ياكبيرنا
مابنرفضهوش
وماتنخضُّوش
{من بيرم التونسي إلى الشاعر إبن ابو خر بوش}
قلت له يازعيم العاميَّه
ده ماحَسَبتوش
كرمك بـ زياده مِغَرَّقني
وانا مااستاهلوش
وإيدين هزتني وضربتني
وبشكل بشوش
دي أيادي بناتي عيون قلبي
اللي ماسكتوش
[مريم] مع [فرح] أختها فيَّ
خبط ماهِديوش
وقالوا لي يابابا انت وماما
ليه مابتِصْحُوش
واللا اصحى يابابا انت لاعِبنا
بقى حلَّق حوش
وصحيت حسيت إنِّي فـ واقع
مااستثمرتوش
وكإن كمان عمنا ( بيرم )
أنا مافارقتوش
كان حلم صراحه جميل جداً
أنا ماصادفتوش
فيه(بيرم التونسي)بـ ينصحني
وانا ماخذلتوش
قال هوَّ صحيح إهداء جامد
0 التعليقات:
إرسال تعليق